Oleh Tgk. Samuti Sp. Mesra
Assalamualaikum ‘alaikum warahmatullah
Saleum sipatah lon keu syedara
Geulantoe ulon keunan meulangkah
Haba ta peugah ta meupoh cakra
Na yg ka trep lawet tanyoe meupisah
Hana tom sahbah meureumpok muka
Nibak lon duek2 woe di meulasah
Teuingat leupah lon keu syedara
Teuingat gampong ka trep ta keubah
Yoh nyan meupisah ta jak sikula
Tamat sikula lheuh nyan hai sahbah
Tanyoe ji tugaih tempat meubeda
Na ladom jioh meureumpok tugaih
Na yg toe leupah wahe syedara
Cit ka meunan kheundak bak Allah
Tanyoe beuikhlah bak ta teurima
Cara raseuki geujok le Allah
Bandum hai sahbah meubeda beda
Yang peunteng syukur tanyoe keu Allah
Ta meuseudeukah nyan samboh tanda
Tanda yg laen cit le sileupah
Syukur keu Allah meumacam cara
Tapi kali nyoe ulon neuk peugah
Keu hai seudeukah lon neuk cerita
Sideh di gampong le ureung sosah
Peulom hai sahbah buleun puasa
Di Aneuk yatim cit brat lom sosah
Peulom hana yah hana soe kira
Sie makmeugang h’an peu ta peugah
Kadang meugapah hana soe kira
Keu baje baro meunan cit sahbah
Poma meuilah meumacam cara
Oleh karna nyan rakan meutuah
Lon pakat seudeukah meuala kada
Tanyoe na bacut Rahmat bak Allah
Hak ureung sosah disinan pih na
Mari ta siseh bacut hai sahbah
Yatim yg sosah ta peugeumbira
Ngon do’a yatim geubri le Allah
Reseuki geutamah oleh Rabbana
Tapi nyo h’an tom ta meuseudeukah
Sabe lam sosah beuthat pih kaya
Macam peunyaket keunan ji singgah
Meunan geupeugah uleh ulama
Lam surah almunafiqun cuba neupeuhah
Sinan geupeugah oleh Rabbana
Lam ayat 10 sampoe ngon 11
Keu bh’ah seudeukah h’an geubri tunda
Aneuk leuk kutru ci cong bak panah
Jeh aneuk siwah di cong bak jeumpa
Meumada ‘ohnoe haba lon peugah
Meunyo na salah meu’ah beuraya.
Editor : Hamdani Mulya
Profil Penulis
Nama:* Drs. Basri Usman alias *Tgk. Samuti Sp. Mesra, *Lahir* di desa Samuti Krueng, Kec. Gandapura,Kab. Bireuen ( dulu Aceh Utara ), 8 Maret 1958.*Pendidikan,* MIN Samuti, MTsN sampai kelas 2 lalu pindah ke kelas 3 SMP Gandapura, tahun 1975 masuk ke SPG Bireuen, Januari 1978 melanjutkan pendidikan ke Unsyiah Darussalam jurusan Bahasa dan Sastra Indonesia. Selesai pendidikan, tahun 1982 diangkat menjadi guru Bahasa Indonesia pada SMKK Neg. Banda Aceh dan tahun 1997 dimutasi ke SMEA Banda Aceh (SMK N 1 sekarang) dan memasuki masa pensiun pada tahun 2018. Alhamdulillah sampai sekarang masih tinggal di Sp. Mesra Banda Aceh.
