Dengarkan Artikel
Oleh Tgk. Samuti Sp. Mesra
Deungon bismillah haba lon peuphon
Saleum bak ulon bandum syedara
Jinoe puasa katrok bak ujong
Ramadhan agong ka rap ji bungka
Ji Tinggai tanyoe teuka laen thon
Semoga Rabbon peureumpok teuma
Bak puasa nyoe pakri keuh untong
Jinoe rakan lon ta ci peurasa
Soai ibadah tamah peu ji tren
Tanyoe rakan lon teuntei ta rasa
Meunyo ibadah ta rasa ji tren
Mari rakan lon ta tingkat teuma
Yoh mantong watee bacut bak ujong
Tanyoe rakan lon bek ek jen daya
Geutanyoe lake keudeh bak Rabbon
Amai le rabbon beugeuteurima
Dosa ngon Allah ta lake ampon
Salah ngon kawon meu’ah ta pinta
Ta mumat jaroe muka teuh bek con
Peulom rakan lon ngon kawom lingka
Silaturahmi cit geuyue sambong
Meubek rakan lon putoh syedara
Amai h’an geutueng tanyoe le Rabbon
Meunyo ngon kawom pake tiep masa
Mari geutanyoe ta ubah euntong
Ngon bandum kawom meu’ah beurata
Peulom masalah ka leupah meuthon
Hana meusambong adoe deungon a
Nyo adoe aduen putoh ka meuthon
Tajak adoe keudeh bak kanda
Ta lake meu’ah jaroe geuh ta com
Bek preh adoe lon troh uroe raya
Yoh mantong Wate puasa bak ujong
Beudoh adoe lon laju beusigra
Jak lake meu’ah hubungan sambong
Seumoga Rabbon teurimong do’a
Keudeh bak Allah ta lake ampon
Be na adoe lon ta pubuet desya
Nyo ngon syedara tanyoe ka akor
Baro le Rabbon peuampon desya
Di bak cong ara na ticem tiyong
Di cong bak sukon na ticem pala
Meunyo na salah haba lon suson
Wahe rakan lon meu’ah beuraya
Hana meubacut na niet bak ulon
Keu rakan kawom lon sinde haba
Meunyo cit keunong lage haba lon
Neujak peubeutoi laju beusigra.
🔥 5 Artikel Terbanyak Dibaca Minggu Ini
