Dengarkan Artikel
Oleh : Panton Burger
Asalamua’laikom warrah matullah
Saleum si patah dilee ulon bri
Sigoe meujamak Ummi ngon Ayah
Teuma keu sahbah wareh fan’s seni
Mula lon peufon dengon bismillah
Izin lon kisah dua krak rawii
Meuheut lon sampo saboh risalah
Murid dalam glah meunoe terjadi
Nibak si uroe mawoe deuh leumah
Nyata lon peugah bukon meu taqi
Teungoh belaja bak jeum poh siblah
Tim-das trok singgah keunan meu ili
Dengon mendadak geuyu buka tah
Asoe geuruwah mandum geu ungki
Ladom mutumung foto ngon keurtah
Cilak ber keulah ngon lips stik bibi
Mandum geusapeh ‘han meuceh salah
Asai dalam glah pareksa mesti
Karap seulusoe tansoe na bantah
Mandum geuleudah siswa ngon siswi
Teuma keu dudoe adoe ain’ syah
Bek ‘an dijok’ tah peurab handibi
Mandum sorotan mata teu arah
Ateuh ain’ syah pucat han’ meukri
Muka ban sudong boh ming kamirah
Di ‘ek tron nafah meutat- tat gaki
Pakon jeut mawoe meuno jeut susah
Peu keuh dalamtah tan chok ta’eu hi
Lansong geu tarek’ meu reubot rupah
Hingga meu darah bak ujong jari
Teutap meung reugam adak meukilah
Nyanban dipapah peu theun bakdali
Lambong bakmurong sitampong lipah
Tangke 0en lawah geutah sep meu-ie
Singkat ceurita deungon wakilah
Jinoe tasurah nibak pak waki
Keudeh U kanto pala seukolah
Mawoe ta surah hukom jeut geubri
Hana trep lawet teubeu-0t langkah
Keudeh peu silah meujak peu bukti
Bantroh utempat ie mata bicah
Bohming kabasah uneun dengon wie
Meucuba buka punca masalah
Hana cit teuhah teu diam diri
Sebab tepandang ureung sep cerdah
Hana meubantah nibak sinyak ti
Jangka dua thon nilai meutamah
Hana yang caprah patoh ban budi
Meuno geukhun pro puwo keukisah
Tinggai hy sahbah ulon ngon Putry
Tatop’ ngon pinto tirai ta peuhah
Meubek deuh lemah kadang cit hanyi
Tinggai lah guru padid droe sa ‘ah
Seubab masalah beu jroh solusi
Teubuka nariet meugriet sang indah
Lisan bak babah meunoe geu putie
Pucok 0en kuntom senambong ulah
Musem ujeun rhah hana meupunyie
Meupeu keuh asoe mawoe dalam tah
Jaweb beu leupah beklee sembunyi
Seu’0t dimawoe deungon nan Allah
Ulon meusumbah meubek neusangsi
Hanya lah buku ngon pulpen patah
Lapek kabeukah meubek neu caci
La’en nibak nyan plastik dalam tah
Ata lam sampah lon cok kembali
Sisa makanan na tinggai siblah
Nyan keuh lon keubah keurimeh ruti
Hanacit la’en bapak Meutuah
Gasin meuleupah kamo tuhan bri
Kadang poma preh lon gisa arah
Tansoe seudeukah nyan keuh meusaji
Maka lon peusom peu’om dalam tah
Bek roeh geuruwah bungkoh peulawi
Maka ulon moe nyoe keuh risalah
Neutoep’ lam madah hina ngon benci
Reudok geulateu kilat seumu plah
Binteh sang teuhah beuhso ek’ kaji
0h’ leuh geudungo mawoe peujeulah
Geudong rab reubah han’kong le gaki
ie mata geuro meu hambo rinyah
Cukop sep tabah aneuk yang faki
Gutugom geucom gesanjong tadah
Tanglong peuneurah tanso padoli
Bukon cit dongeng atau hikayah
Nyata al-kisah bak sidroe siswi
Dalam internet pernah di unggah
Ceurita kasah meunan aseuli
Mungken jeut guna saboh fa’edah
Ganto hidayah geunaseh rabbi
Miseu ban nanggro seuramo meukah
Peukeuh ek’ pantah meuno terjadi
Jalan di cunda tumboh u bungkah
Uneun ta arah sampoe u PASI
0hno lon usong seunambong lidah
Lon lake meu’ah bak gure rawii
Meupat na meujho tuto lon salah
Karangan meubhah keu ureung faki
Akhee wassalam ulon toep’ kisah
Jaroe dua blah ampon beu neubii
________________________
🔥 5 Artikel Terbanyak Dibaca Minggu Ini
